મ્યુનિ.ને માથે નુકશાન! મલ્ટિલેવલ પાર્કિંગની દુકાનો વેચાતી નથી.

અમદાવાદ મ્યુનિસિપલ કોર્પોરેશન દ્વારા શહેરના પ્રહલાદનગર વિસ્તારમાં આઠ માળનું મલ્ટિલેવલ પાર્કિંગ વિથ કોમર્શિયલ બનાવ્યું છે. જેની જમીનની કિંમત ₹273.57 કરોડ અને તેની પર થયેલ બાંધકામ કિંમત ₹76.11 કરોડ એમ કરીને આખા ઢાંચાની કુલ કિંમત ₹349.69 કરોડ છે.

પરંતુ આ પ્રોજેક્ટ અસફળ દેખાઈ રહ્યો છે. જેથી સ્ટેન્ડિંગ કમિટી ચેરમેન દ્વારા મ્યુનિ. તંત્રને ટકોર કરવામાં આવી હતી કે જો મલ્ટિલેવલ પાર્કિંગમાં કોમર્શિયલ દુકાનો વેચાતી ન હોય તો આવા પ્રોજેક્ટ બનાવશો જ નહીં!  

પ્રહલાદનગરમાં બનાવેલ આ મલ્ટિલેવલ પાર્કિંગ સાથેની કોમર્શિયલ દુકાનો માટે ભાવનિર્ધારણ કમિટીએ જગ્યાનો ભાવ ₹ 4.03 લાખ પ્રતિ ચો.મી. નક્કી કર્યો હતો. પરંતુ જગ્યા ન વેચાતા તેનો ભાવ ઓછો કરીને ₹ 3.96 લાખ પ્રતિ ચો.મી. નક્કી કરાયો છે. તેમ છત્તા આ દુકાનો વેચાશે કે નહીં તેની પર પ્રશ્નાર્થ છે.

આ વિસ્તાર માટે 2025થી મહત્તમ જંત્રી ₹1.03 લાખ નક્કી થઈ છે. પરંતુ વેચવા માટે તેનાથી 4 ઘણી વધુ રકમ નક્કી કરાઈ હતી. જે કારણથી સ્ટેન્ડિંગ કમિટી ચેરમેને મ્યુનિ.ને ટકોર કરી હતી કે આટલી મોટી રકમ ખર્ચ કર્યા બાદ પણ વેચાણ ન થતું હોય તો આવા પ્રોજેક્ટ બંધ કરવા જોઈએ.

આ બિલ્ડિંગમાં 78 જેટલી ઓફિસ, 20 દુકાનો અને મલ્ટિલેવલ પાર્કિંગ છે. જેને વેચવાના બે વાર પ્રયત્નો કરાયા હતા. પરંતુ અસફળતા બાદ ભાવ ઘટાડવાનો નિર્ણય કરાયો છે.  

આ સિવાય મ્યુનિ. દ્વારા બનેલ સિંધુભવન મલ્ટિ લેવલ પાર્કિંગ તથા નવરંગપૂરા મલ્ટિલેવલ પાર્કિંગમાં બનેલા કોમર્શીયલ એકમોના પણ આવા જ હાલ છે.